1Th 2 | MHL | STEP | Aria emar unowik, ni baliwep amisareman, i eena ikiwep ni niamiya ikok uuwamik nain uuwowa kua-pa me yiar arek.

1 Thessalonians 2

Pol Tesalonaika-pa uuwowa onak nain wame maek

1 Aria emar unowik, ni baliwep amisareman, i eena ikiwep ni niamiya ikok uuwamik nain uuwowa kua-pa me yiar arek. 2 Ni yia amisareman, i iiriw Filipai-pa ikemik nain yia firekami sirirowa yiemik. Ne nan ikok ni niar ikiwemik. Nain pun naap, i uuwam-ikemkun mua papako-ke yia samo-samorami uuwowa yiar pu-puukam-ikemik. Nain Mua Maneka-ke yia asipami yia kekanoweya ona opor eliwa nia maakemik. 3 Moram ni Yeesus opora wiar opaka naep nia maakemik nain i sira samora me ookami nia maakemik, ne wadolalemi me nia peeskimemik, weetak. 4 I Mua Maneka ona iiriw yia akimap mua eliwa-ke yia naep Yeesus Krais opor eliwa wia maakowa uuwowa nain yiek. I naap uuwimik. Naeya wi mua kookalowa me wiokimik, weetak. I Mua Maneka kookalowa ookimik, eena yia akimami kema yia pupiya nain. 5 Ni yia amisareman, i opor afila-ko me nia onamik, ne maa niar mufu naep me nia peeskimemik, weetak. Mua Maneka pun makena yia naiya. 6 Wi unuma yia purupuk, naap me maimik. Naapeya ni unuma yia purupeka me nia naimik, weetak. Wi mua papako pun wia.

7 Ne i Krais aposel-ke naemi ni maa-ko yia asipeka naep mia nia teekam-ikekamik. Nain i naap me onamik, weetak. I nia saalolokam-ikemik, wi emeria eena muuka wia saalolokimik naap. 8 I manek akena nia kookalep, emawik, emar eliwa nia naimik. Naapeya i kemelap Yeesus Krais opor eliwa nia maakemi uurarow marew nia asipam-ikemik. 9 Aria makena, ni fain yiar kema suuwiman nia naimik. Feenap, i muuta-ko me uurarem-ikemik, anane uura ne amirika naap oospem-ikemik. I mia me nia teeku naep wapena ekekiarem-ikemik, feenap, i Yeesus Krais opor eliwa nia maakemi yiena maa enowa uuwowa nain pun onam-ikemik.

10 I niamiya ikemik nain opor makena nia maakemi sira kakeniw onam-ikemik. Nain nis-ke yia ane-kekanowami eliw wia maakowen, ne Mua Maneka pun naap yia ane-kekanowinon. 11 Ne fain pun yiar amisareman. I nia kekanowami nia kakenam-ikemik, wiawi eena muuka wia saliwami suule baliwep wiiya naap. Ne Mua Maneka nia fareya o pika kemena-pa ikok o parina-pa wiar ikeman. I muut nain nia maakem-ikemik, “Ni Mua Maneka kookalowa ookami baliwep ikeka,” naap maimik.

13 Mua Maneka opora nia maakemkun wiar opaman nain me wi mua opora-ke wiar naeman, weetak. Makena, opora nain Mua Maneka opora-ke. Ne opor makena nain-ke ni kema-pa niar uuwam-ikaiya. Naapeya i nain naep anane Mua Maneka sira eliwa naakimik. 14 Emar unowik, wi Yuudia kame Yeesus Krais teeria wiena owow epaskun-ke sirirowa wiimik. Nis pun, niena owow epaskun mua papako-ke naap nia onimik. Naapeya ni sirirowa aawiman nain wi saarik. 15 Wi Yuuda-na wiena owow epaskun eena iiriw profet nain wia ifakimem-ikemik. Ne yiena Maneka Yeesus pun ifakimemik. Ne aakisa is pun i owow unowa ikiwimik nain yia samo-samorami yia iirarem-ikemik. Wi naap onimik nain Mua Maneka kema bagiwirowimik, ne mua wia iiwuarimik. 16 Mua Maneka opora owow unowa wiar ikiwemi wia maakowa nain era yiar puukimik, eena Mua Maneka wia aawowa opora nain. Wi pina naap oni-ikiwemi wiena pina ane-kurumami iiwawun tauwat opamik. Naapeya maken akena, wi Mua Maneka bagiaw wiar urufikuan.

Pol ikiwep nainiw wia urufowa maek

17 Emar unowik, i ni niamiya ikemkun wis-ke yia iirariwkin ekapep fan ikemik. Makena, i fan ikemik nain epa me ekamik, nain i manek akena nia kema suuwam-ikaimik. I kirep ikip nia urufowa nain kema manek akena nia tuupam-ikok era akupowa uufunimik. 18 I kirep ikiwep ni nia urufu naep onimik. Yos-ke makena, ni niar ikiwowa nain akimowa unowa arem-na wia. Satan-ke era yiar puukam-ikaiya. 19 I manek akena nia kema suuwimik. Moram wiimar yiena Maneka Yeesus nainiw ekapiya nain i o miira-pa wiar iimarep i uuwowa eliwa onam-ikemik nain maa mauwa o ofakowiyen? Ni naneka, ni nain ikoka o ofakowiyen. Nis-pa i maa makena urufami manek akena kemeliyen. Ne ni muuta nain i palaniyen. 20 Makena ni muuta nain i unum maneka aawep manek akena kemelimik.